尋日就同史友們講到點解唐朝嘅男人都唔想成為「駙馬」，呢個現象就同當時嘅女性地位有關。喺唐朝做一個女人可能都算係好幸福，但做一個「小三」就真係會幾慘喇！
喺古代男人嘅地位都係唔差，大部份朝代有錢嘅男人都可以擁有三妻四妾，遇到鍾意嘅妾侍想幫佢轉正都唔係太困難，但喺唐朝呢件事就不被允許喇！普遍嚟講唐朝嘅男性成親年齡都要去到20歲，而女性就係15歲左右，由於古代都係講求門當戶對，男性喺未有一番事業之前可能都未必會成親。之不過，咁樣並唔代表佢哋唔會發展男女關係，唔少人喺成家立業之前可能就已經會同妾或者丫鬟生咗小孩。直到「三十而立」有咗一番事業之後，呢啲男人先至會「明媒正娶」一個正妻。
喺其他朝代，可能呢啲妾或者丫鬟都仲有機會「轉正」成為正妻，但喺唐朝就有明文規定一旦做咗呢種「小三」嘅角色，就一定唔能夠被「扶正」，只有名正言順、明媒正娶嘅正妻先至有資格持家。所以喺唐朝嘅「小三」就真係完全有付出冇收穫喇！
原圖嚟自網絡